كذا من قبة اتزار.. ومولاها في النار

كذا من قبة اتزار.. ومولاها في النار
الجمعة 7 مارس 2008 - 17:01


كذا من قبة اتزار ومولاها في النار


الغُنَّة عاللّي بايَتْ بلا عشا
فِ فَمْ السبع غذاتو ،
المعنى عاللي بين البساطل والمحنشة
بين ألف ليلة وليلة زهواتو .
واحد بلا خدمة
لاخر ما يحطش يدو ف الما .
ﭭلبي على اللي ولّى نمرة ، وسدُّو عليه
لاخر ، ابواب الدنيا كلها مفتوحة ليه
واحد عايش نهار بنهار
النهار اللي داز يـﭭول عليه فلتة
لاخر جاياه الصابة
ما عرف فيها لا درسة لا حرثة
تخمامي فاللي بايتين تحت القطرة ،
لاخر طالق الخيط برا ،
واحد لـﭭـى دواه ف الحضرة
بالحفا مسري فالسمرة ،
وحدين مردومين ف حُفْرة
لاخر بفلوسو ، دار الناس ﭭنطرة . يا السايل : هاد الضباب ، حتى لاين ؟
علْ الضحك ، لاش قل
والهمْ علْ لوجوه باين ؟
نواجبك :
التخمام ف القلوب ، احتل ،
الخير كثير، وشي ماكاين
شي يديرها ، وشي يوحل ،
واحد قضى الغرض ، خف من تيتْسْويتْ
لاخُرْ شكى ، ﭭالو ليه ، اوقـَفْ تْساين
هذا سابقك ،
وخّا جا مْعطّل .
نواجبك :
الغمزة قياس الحُرْ
وحنا ولفونا الدّبْزة
قرّاونا الدوا هو الصبر،
وعرفكم يبقى قبل الهمزة
راكبين سفينة امواجها صخر ،
والظلام قفز
قفلو ف كنز
محروس في قاع البحر ،
والزلط واقف يمتحن
كيّت اللي غلط واعتر
زوبية المعيشة مخطاف
العود ميت ، والحداد بارك يسمّر .
نواجبك :
زماننا كثر فيه التبعبيع
ما طالعة فيه غير غير اللي ﭭال : باع
والبرَّاحة يشنعو عليه ولد القاع والباع ،
شلة شبابية بشواهدها
ﮔالسة تبردي لوقت
حاطين عليهم بالتدلاع
ودياول السكاول يلعبوهم التطواع ،
واللي فتش على خبيزة
يـﭭولو ليه : بوجادي ، سير اعطينا التيساع .
ساوي آلبوهالي ساوي
را البِّيبَّل محيراه الدعاوي
ماحيلتو للغلا ، ما حيلتو للرشاوي
تلفاتو لوانات ، واللغا الخاوي
هالفنيدي هالعكري، هالكاموني، ها السماوي
والكْراسة تبوَّق حتى امّالين لعراوي
وحدين مرحين ومفايجطين بين الشهاوي
ووحدين بين الزلط والـﭭحط عرﭭهم لاوي
لاخر عندو فيرمة ﭭد الخريطة
وقبيلة كاملة تْكامش على شْبَرْ د الْما
يـﭭولو كلنا خاوة – آش كاين ما تخاوي ؟
ساوي آلبوهالي ساوي
وفكّرْ آش يفرق واش يخاوي ؟
واش مول لـﭭدم المشَّـڤ بحال مول الخد الراوي ؟
بحال مول الخد الراوي ؟
وﭭل لي واش دابا نفعلو ،
وغادي نتركو ،
تداوي ؟
را الدفا عجب شي ﮔنس
واللي مكسورة خاطرو يجبّر بالكاوي
واجبتك ، اعطيني خو كلامي .

ـ كلشي زاز .. كلشي زاز
ساعتنا ما محقّاشْ
مارتنا ما مـﭭادَّاش
احنا وحيدة والسياسة لاش
كانت لَعْمارة ما مساوياش
واليوم الدَّقَّة متاوية بلاش
عاش الوطن عاش
هذا مقوس .. هذا راش
هذا مقصر مع الحناش
وكلشي زاز ..كلشي زاز
ـ ما نـﭭوليكش: كلامك ماشي على فصالتي ..
كلشي داروه
ما بقى غير حشومة واتفر،
بغاوك عبد حرطاني
ويـﭭولو عليك ازفر،
يتعترو ف جلايلهم
يتبحلسو لبنادم الزعر ،
واحد بالقناطر حسابو اعمر
وقبيلة كاملة جيوبها تصفّر
ما لاﭭية ما تحنجر .

واحد من دابا لبلاصتو فالانتخابات راشم
واحد على بلاصتو قارم
لاخر كمّش بزقة ، يحساب ليه فلس
عليها كارم
بغاوك تـﭭول كلشي مليح
إيلا بغيتي تكون سالم
(ﭭلت شي احزاب شدّات لانْتْرِيتْ
أو شغل الفارة هذا
ﭭالو : أنت تفتش على خزيت (
كلشي باغيك للخط تروم
واحد باش يطلع دارك سلوم
لاخر زاهي باشر لعُلُوم
وأنت تخمامك دار لك بوزلُّوم
كِيلا حايحة نايضة وأنت ف الدوم
إيلا قبلت – معاهم – التوِيزَة تلقاك مخدوم
وإيلا عكّسْتِ ، فين مشيتِ تلقاك مرشوم .
ساوي آ البوهالي وترتنا،
ومد يدك لقاع الخابية
كلامنا تسدّا ، ومَعْنْتُو منْجَجْ
وقبل ما تقسَّس
بُخْ ورُشْ .
ـ شي كلب ملّلي يحس بشي همزة ودنو تقلّش
وعليها شي وحدين فضلو العمى عَ لعمشْ
كِ شِي دالية ، تسقات وبدات تعرّش
سارحة ، وخّ الطريق بالـﮕنايز مفرّش
جاب لي الله بحال إيلا لرض غادية وتكمّش
عليها .. المسكين بحال الصّم
اللي جا .. به يتْيَمَّم
وهو يسُوطْ ويتْفش
وشي واحد ، تـﭭول ، هذا شهرو بقوّة ما تكرّش
دوك اللي عطاوك الكلمة
يلعبو معاك كاش كاش
إيلا قولبوك
تـﭭول أنا عايق بهاذ لفلاش
إيلا شفت واحد صبّت عليه الدنيا
وﭭلت : مناش
يـﭭولو عليك أنت مكروه ، ما تسواش .
اقْوَى السْكُبِّي
وكيف يدير زواق الكلام حتى يمحي الطَّاش
ﭭالو: حزمو السمطَة
ﭭلنا : واللي كان ؟
ﭭالو : مشى
ﭭلنا : وُفاش ؟
وجْبْتي درتها ، والكلام بيع ومقال
بالحق ، عشيركْ ما تدوزوش

ـ نواجبك :
ادَّمصو اللي كانو نيف وﮔاشوش
العيب في شي وحدين ﭭالو وما داروش
المراح مشطب ومرشوش
الـﭭـعدة فيه خاصها بلان ،
صيفطت الدراري للـﭭاعة
جابو لك اخبار الفدّان ،
ادّاه كبير الجماعة
ﭭلت : نقيد به الدعوة
تفيَّك ، وجبد لبلان.
ﭭال لك : القضية في الشاكوش
مشى وجى ، بحال إيلا كيلعب سَبْسَبّوتْ ،
ﭭال لك :
عظامك تحت سناني كِ التوت
إيلا ما قبلتِ تبيع
نـﭭول ليهم دوزو فيها طريق لارّوت .
فهمت أنت باللي اللعيبة ف الجْعِيبة ،
عرفت باللي الحق صوباتو ليه التقرقيبة،
هو معاه مدفع،
وأنت باغي تتبورد ب ﭭصيبة .
حط يدو على ﭭفاك
وأنت عارف ،
اللي شدك من ﭭفاك،
بحال إيلا تخطّاكْ .
والقاري اللي ﭭال لك: مول الحق ما يضيع
وماشي بزز منك تبيع
شفته ، بقى كيدور
بين الجماعة وتّلّى اللور
ﭭلت : المْفانّة اوْقر
والسكات من الغدر ،
الحساب صابون
والصبر كيدْبر ،
بيناتنا القانون
ﭭالو لك : شاب وتقهر،
ولاو يْفَصْلو ليه
وإيلا انطق بالحق
يـﭭولو ف السر.
ﭭالت الجماعة : كل شْتا وليه ربيعو
واللي شْراك بغاك تطيعو
ما تنساش الغرس ، قبل مارس زريعو
واللي عطى خدّو را لْما رفدو
ﭭال كبيرهم :
اللي وصل منخرو يعضو
عندي طابع المخنز ( المخزن )
وانت …الدبانة بدات ف راسك تزنزن .
هزك الحال
مشطة و ﭭدم ،
شحمة مفرشخة ف الدم ،
اسلخ وادفن واردم
كلهم عارفين وضاربين الطّمْ .
ها كلامك صرفتو عقيق وموزونة
آتيني بشي دكَّة مْهَنْدبَة
ف قاع الكاس مدفونة ،
أو واحد دم الكلب
دمعتو على خد الكاس مدردبة
من بعد واحد السـﭭطة منغومة .

ـ هاك واعرف من جاك
اعرف خاك
هو من أتاك ، ماشي اللي والاك .
خليني من واحد عَوَّام ف جرف عالي ،
آحيانا على اللي ما عندو لا تالي لا والي .
ﭭالو : غرّق الجرح
لا بد من الصلح
والصلح فيه الربح ،
لعدو تجبَّر،
احنا مكفيّين
وهو فينا يْطَحْطح .
انبت ف الحطة
بحال مرض الحي
و ﭭال : هذا مراحي ،
واحنا ؟
نخطبو ، ونشخرو، ونضربو الـﭭُبَّاحي .

تناتفو يا اللي الزيروات ، شواشيكم ،
زبرو زيتون حيفا
باش ترضى لالَّة ماريكان عليكم .

بالحق ، كلشي بان
ف زمان العربيكان
العمامة المعَكرة عافطة علينا
ملّي نْفَنْفنو ، تـﭭول :
السفيه يقرا ما فيه ،
راني مريضة وما ﭭادة ،
وإيلا عيّط عزيزي ريـﮔان
نوضوني ليه .
ﭭل لي :
واش هذو عرب ؟
عرب الكتاب
ولا عرب التراب ؟

ـ نواجبك :
اشهد يا زمان
العرْبي يحفر لخوه
باش يفرح البرَّاني
الماضي ردموه
بشي دراهم كلشي تَّمسح
العقد اللي بِنّا رهنوه
واللي برَّزناه ، لقيناه مسطرح
اشهد يا عَلاَمْ
اشحال من صراط ف طريقي
زوابي من كل جيه
لعدا ، يتسناو حريقي
وخوتي زايدين فيه .
بالحق كلشي بان
ف زمن العَرَمِيكان .
……
……
أَخَّرْتها :
اللي ف الشرق ، حابض ﭭدام لعْدا
وُورا خوه سخون ،
واللي ف الغرب ، ليلة الغلطة واللبدة
عند صندوق التابعة مرهون .


1987


أحمد لمسيح

صوت وصورة
شراكة "تيبو أفريقيا“ وLG
الجمعة 29 مارس 2024 - 11:43 1

شراكة "تيبو أفريقيا“ وLG

صوت وصورة
احتفاء برابحة الحيمر في طنجة
الجمعة 29 مارس 2024 - 10:03

احتفاء برابحة الحيمر في طنجة

صوت وصورة
احتجاج تلاميذ ثانوية فرنسية
الجمعة 29 مارس 2024 - 00:30 4

احتجاج تلاميذ ثانوية فرنسية

صوت وصورة
شهادات للتاريخ | العثماني بالجزائر
الخميس 28 مارس 2024 - 23:00 3

شهادات للتاريخ | العثماني بالجزائر

صوت وصورة
فواجع النقل المزدوج
الخميس 28 مارس 2024 - 22:15 4

فواجع النقل المزدوج

صوت وصورة
تقنين التنقل بالتطبيقات
الخميس 28 مارس 2024 - 19:55 11

تقنين التنقل بالتطبيقات