24 ساعة

مواقيت الصلاة وأحوال الطقس

20/11/2019
الفجرالشروقالظهرالعصرالمغربالعشاء
06:3208:0113:1816:0218:2519:43
الرطوبة : %50
الرياح : 50km/h
20° 10°
20° الدارالبيضاء
20°
الأيام القادمة
الأربعاء
الخميس
الجمعة
السبت
الأحد

النشرة البريدية

اشترك الآن في النشرة البريدية لجريدة هسبريس، لتصلك آخر الأخبار يوميا

المرجو التحقق من صحة البريد الالكتروني

إشترك الآن

استطلاع هسبريس

هل تؤيد إسقاط الفصول المجرّمة للحريات الفردية من القانون الجنائي؟
  1. هل قلّص "فيسبوك" ظاهرة كتابات الطلبة على المراحيض والطاولات؟ (5.00)

  2. أصوات تدعو إلى اقتناء "الأدوية الجنيسة" لمواجهة "لوبيات ريعية" (5.00)

  3. مسابقة لحفظ القرآن‬ تجذب تنافس الأطفال بشفشاون (5.00)

  4. القضاء يفتح ملف "سمسار المحكمة" .. والموقوفون يعترفون بالتهم (5.00)

  5. تلاميذ يواصلون اكتشاف "كنوز الإسلام في إفريقيا" (5.00)

قيم هذا المقال

0

كُتّاب وآراء

Imprimer
الرئيسية | منبر هسبريس | المغربية، الأمازيغية، العربية، الحسـّـانية لغات رسمية

المغربية، الأمازيغية، العربية، الحسـّـانية لغات رسمية

المغربية، الأمازيغية، العربية، الحسـّـانية لغات رسمية

الجدل، النقاشات، الحادة بعض المرات، اللي دارت هاد ليـيــّـامات مهمة، أو يمكن لينا نعتابروها مخاض، مناظرة وطنية ناجحة اللي بالأخص تبنــّـاتها الجرائد الإليكترونية، أو كانحـيـّـي من هاد المنبر الدور اللي كاتلعبوا هاد قنوات التواصل الحديثة، السريعة أو المتميزة، بالطبع كاينني ديما تجاوزات، ستفزازات غير مقبولة، لأنه إيلا بغينا نثريوْا النقاش البناء ضروري نحتارموا بعضياتنا أو ما نفرضوا على حـدّ ميولاتنا، مزاجنا، رأيتنا، لأن هاد المشكل اللغوي باقي مطروح أو ما لقينا ليه حل ّ لحدّ الآن، أمــّـا الهضرة، الكلام الفارغ ما عندو باش إفيدنا.

هادا ميدان خاص بأهل المعرفة أو تاريخ اللغات أو تكوينها، ماشي غير اللي كايـدْوي شوية باللغة المغربية غادي يمكن ليه ينتاقدها ولا ّ إدافع عليها، أحسن دليل هي ديك "مولاة البطبوط" اللي طالع ليها الزعاف أو السكار، رافضة يقراوْا أولادها بالمغربية، ولوْ وزارة التعليم قامت بتجسير، بمصالحة المدرسة مع محيطها، مع الهوية المغربية، باش ما تصدمش الدرّي الصغير ولا ّ الطفلة ديال ست سنين ولا ّ سبعة، أو هادا "أمر محمود"، الوزارة الوصية ما بغاتش تقرّي الناشئة باللغة المغربية، ولاكن بغات ترفع من معناويات الطفل، تفتخر بثقافتو، بحضارتو، بكيانو، لأن كيف قال المفكر الألماني "مارتين هايديغر": "اللغة هي دار الوجدان".

هاد "مولاة البطبوط" كاتخـلــّـط مع الأسف بين "التدريس باللغة المغربية" أو "إدماج بعض الكلمات المستمدة من ثقافة الناشئة" لأسباب ديداكتية أو بيداغوجية، هادي كيف أمـّـا كان الحال كاتعرف أتـــّـكــلـــّـم باللغة المغربية بطلاقة أو لسانها ما معـقـودش، مسنسل، عاد خصّـو اللي إروّضو، إقوم ليه بواحد "العملية تدليكية" باش إتــّـسرّح مزيان، بحال واحد خيــيــّـنا اللي بعيد كول ّ البعد على هاد الموضوع، ما كايتقن لا عربية لا مغربية، حتى جمل بساطين ما كايعرفش إكـوّنهوم، النــّـتـوى كايخلــّـطها بالمذكر، أو المذكر كايردّوا نـتـوى، بحال إيلا ما عايش بيناتنا، قاري كولــّـي غير بالفرانساوية، بالنسبة ليه، ولا "مولاة البطبوط"، علاش الدّراري الصغار يقراوْا بالمغربية اللي كايعرفوها أصلا؟ هي النكليزيين اللي كايعرفوا النكليزية، الألمانيين، الصبليوينيين، الطاليانيين، الفينلاديين، ما كاين لاش يمشيوْا اللـمدرسة، لأنهم كايعرفوها مسبقا، عاد نثيقوا بهاد النماذج اللي ما كايخدّموش حتى عقلهوم، يمكن لينا نعتابروا الكـسل غباء الذات، أمــّـا الغباء كسل العـقـل، أو تشرح ليهوم بالخوشيبات: "نــو ويـيّ" اللي ڭـالوا النــڭالزا.

زيد عليهوم الطاهر بن جلون اللي كايكتب غير بالفرانساوية أو بعيد كول البعد على هاد المضوع، حتى هو ما كرهش يفتي علينا أو يخطب فينا، أو تسوّلو على 3 ديال الأمثلة المغربية، ولا ّ كتاب، شعراء مغاربة اللي نتجوا، بدعوا باللغة المغربية، ما يبقاش فيك الحال إيلا ما لقى باش إردّ عليك، عمـّـرنا سمعنا عليه أنه كتب ولا كتاب، مقال واحد بالعربية اللي كيدافع عليها؟ هاد النوع خايف غير على سلعتو لا تبقى فى عـنقـو، فى عوط ما يثري الخزانة الوطنية المغربية بلغاتها، حضاراتها كالس كايتب لــَـفـرانسا أو المفرنسين، هادا هو الإستعباد، الإستلاب، التحول الجنسي الهويياتي.

فيئة أخرى، المطورّة فيهم زعما، كاتقول لينا بأن الللغات اللي معتارف بيهوم الدستور يلا ّه جوج "لا ثالثة لهما": العربية أو الأمازيغية

1. هاد الدستور صدر على يدّ الشيوخ اللي قـرّروا فى مستقبل الناشئة أو الشباب المغربي اللي ما واردش فيه، لأنهوم كايتواصلوا، كايكتبوا باللغة المغربية، يعني الدستور فى واد، أو الواقع فى واد آخور.

2. الدستورماشي قرآن منزل، يمكن ألــْـبعض البنود أتــّـبدل، أضــّـيف ليها بعض السطورة ولا ّ أتــّـحدف بكول ّ بساطة.

3. كاين إجحاف غير مقبول فى حق شعب "عن كامله" لما أتــّـحجبات اللغة المغربية أو أتــّـفـرتات فى التعبيرات الجهوية المتعددة، أو هاد الفعلة ما إكونوا أمــّـاليها غير حزب الإستقلال أو حزب العدالة أو التنمية.

4. اللي سهروا على مسوغة الدستور لهاوْا المغاربة، المغربيات بالعربية أو الإمازيغية أو التطاحنات الدونكيشوطية، فى العمق اللغة الفرانساوية هي اللغة الرسمية ديال البلاد أوالي ما كايتقنهاش مصيروا البطالة ولا ّ الحريـڭ.

على ما كانشوف، إيلا ما قـدّيناش ندبـّـروا خلافاتنا اللغوية بطريقة عقلانية، ضروري يقرى كول ّ واحد باللغة اللي كايرتاح ليها، يعني اللغة المغربية، الأمازيغة، العربية أو الحسّـانية كلغة جهوية، ما كاين حتى شي حرج، كانموذج يمكن لينا نتـــّـاخذوا سويسرا، عندهوم 4 ديال اللغات الرسمية: 1. الألمانية، 2. الفرانساوية، 3. الطاليانية، 4. الرّومانش، فينا هو الموشكل؟ أو الأرقام "أحسن دليل" إيلا بغينا نقارنوا هاد البلاد مع لوخرى، أو غير الكوسالى غادي إقولوا ليك ما تقارنــّـاش مع هادوك، مالنا حنا؟ ما عندنا مخ، عـقـل؟

كاتعيش فى سويسرا 8،5 مليون نسمة، الدخل الخام: 678 مليار دولار، الدخل الفردي، يعني ديال كول ّ مواطن، مواطنة: 80 مليون سانتيم مغربية، عندنا حنا 36 مليون ديال البشر، الدخل الخام: 109 مليار ديال الدولار، أو الدخل الفردي: 3 ديال المليون سانتيم مغربية، أو كاينين بعض الجامعات السويسرية اللي كاتنتامي ألأحسن الجمعيات فى العالم، يعني من "الـطــّـوب" 100، حنا فى شمال إفريقيا أو الشرق الأوسط، من 1000 ألــّـفوق، علاش؟ لأن سويسرا عتامدات على اللغات الأم، على لغات حية، هاكدا سـخــّـرات، وظــّـفات جميع الطاقات البشرية "عن كاملها"، أو هادا هو حـلــّـنا الوحيد وإلا ّ غادي ديما نضورو "في حلقة مغلقة" أو نرْميوْا كول ّ عام 300000 ألف تلميذ، تلميذة للشارع.

كاندفعوا البعض مـنـــّـهوم إخاطروا بحياتهوم، حياة عائيلاتهوم، مؤسف تشوف درّي ولا ّ بنت باقي كاترضع حارڭـة مع أمــّـها أو أبــّـاها، شنو ذنبهوم؟ تزادوا فى أوسط التعساء، المحرومين أو المسحوقين؟ شعار هادوا اللي مغلوبين على أمرهوم: اللي ما خاطرش، ما عمـّـرو يعرف شنو هو الأمل.

وا الناس ديال السياسة، وا براكا، راكوم خـرّبتوا البلاد أو هجّرتوا دمّكوم أو لحمكوم، لقاوْا حلول عقلانية قابلة للتطبيق، أو براكا أو نتوما تلهيوْنا بالمشاكل الجانية، كونوا جرّيئين، نقــّـزوا فوق ظلكوم، تجاوزوا خلافاتاكوم الإيديولوجية أو صلحوا هاد المنظومة التربوية المعطوبة، مشاكـيل هاد الشعب فيكوم، فيكوم!


الآراء الواردة في التعليقات تعبر عن آراء أصحابها وليس عن رأي هسبريس

الإشتراك في تعليقات نظام RSS تعليقات الزوّار (2)

1 - متتبع الخميس 13 شتنبر 2018 - 22:50
هذا هو الأستاذ اللي يبغي المصلحة للجميع .. الكلام ف الصميم .. المعقول هو هذا .. لا بديل عن اللغة المغربية في المدرسة المغربية .. الكل غايسفد، ميبقى حتى واحد على جانب الطريق .. بالتوفيق إن شاء الله.
2 - اقلام. الاستبداد السبت 15 شتنبر 2018 - 18:54
لا نعرف عن الحسانية الا. النزر القليل و نعرف. عن الصحراء المغربية ان اهلها في الشمال من ايت بعمران بينما اهل الجنوب ظاهريا عرب الحسانبة لهجة البعض منهم اي لهجة للعربية ًفها. انت تعود مرة الى نفس الموال تنفث سمومك و توظف احدى الدارجات العربية لاستهداف الامازيغية ، تصبو الى تفريق دم الامازيغية بين اللهجات و اللغات فل يطمئن كبريأك العربي المسطور في الكتب الصفراء واعلبها للاعاجم و التي احيلت الى الطوابق السفلية للارشيفات وفي نرجمات وتقل وسرقات اداب وعلوم الغربيين في الماضي. القريب ابنداء من جبران وطه الى الاتحادات وجمعيات الادب والفنون الحالية وندكرك اننا لن نلزم احدا بالامازيغبة غدا و قد طالبنا وسنظل بمدرسة امازيغية بجانب اخرى عربية اي بصفة عامة وقطعيا بازدواجية المؤسسات ًفلسنا استبداديين او نرجسيين
المجموع: 2 | عرض: 1 - 2

أضف تعليقك

من شروط النشر: عدم الإساءة للكاتب أو للأشخاص أو للمقدسات أو مهاجمة الأديان أو الذات الإلهية، والابتعاد عن التحريض العنصري والشتائم.