البـرلــمـانـيـون وغـريـّـبة

البـرلــمـانـيـون وغـريـّـبة
الإثنين 15 أكتوبر 2018 - 23:04

هادي زيدها على مول الشـّـكولاتة، مسكـينة، حـڭـروا على الغريبة، على الحيط القصير، رفضوها تدخول ألــّـمدرسة، تاخوذ الباك، تعمل الماستار فى شعبة “مستملحات المخـبوزات”، (“مخبوزات”: عربية “دوريجين”) ولاكن حلاوتها مرغوب فيها، “جردوها من ملابسها”، يعني حوايجها، الكاغيط اللي محزّمة بيه، غتاصبوها، حـطــّـوها فوق لسانهم، ذابت، تـلــذذوا، غير قضاوْا حاجتهم لاحوا قشورها فى الزنقة، يعني كاغيطها، هادي هي كول الغلة أو سبّ الملة.

بالرب إيلا هادوا كايعانيوْا، بالأخص خفافين اليـدّين، من ضطرابات شخصية، عايشين بين الإدمان على الكذوب أو عدم الرشد، أحسن دليل هي الفضايح الجنسية، فضايح المراهقين، أمــّـا الكذبات المبرّقات، “لا تحصى”، غير فى أبريل 2018 سمعنا أن الحكومة غادي توفـر 1،2 مليون فرصة شغل حتى 2021، يعني 300000 كولا ّ عام، واه، هاد الكم ّ كـولـــّـو؟ على هاد الحكومة كاتـنطابق القولة التالية: اللي كايكذب بزاف، ما كايعقلش بزاف، كون كايثيق الشباب المغربي بأقوال هادوا ڭاع ما يحرڭ، يقراوْا المسؤولين بعدا غير التعليقات ديال المواطنات، المواطنين فى الصحف الإليكترونية، لأنه كاين تجاوب فوري، بلا فيلتر ولا مساحق التجميل، خلاصة نتقاد الناس: “سـئمنا من كلامكم، من الــبــلابــلا”.

هادوا ديما غادي يبقاوْا عايشين فى صراع مع نفوسهم أو شهواتهم اللي طاغية عليهم، أو ما كايصارعوا حـدّ، غير راسهم بيدّيهم، هادي أصعب معركة يمكن الإنسان يخفق فيها، لأن طرف من المخ كايقول ليك ما تعملش يدك فى جيب المواطنين، يعني الضرائب المباشرة أو غير المباشرة، لاخور كايقـول ليك أو أنا مالي! غير البارح كان مقطـّع، مدربل، دابا رجع ملايري.

اللي مهووس بخفة اليدّ كايطيح على كولّ حاجة تهـجــّـمات على عينيه، يا حسرة، جبن، عسولات، كوستيمات، صبابط “سـيـنــيــي”، غير باش إلبــّـي ديك الرغبة، البلية، باش إبهر الناس، أو ما كايحشمش حتى إيلا حصــّـلتيه، لأنه ما عندو علاش يحشم، كايحشم غير “الـدّرويش”، أمـّـا اللي خفيفة يـدّيه متكبر باغي إقـتـلك بالسمّ، إورّي ليك حنة يـدّيه، حدودك، الإحساس بالعجز، بأنك لا حولا ولا قوة عندك، هاد النوع من خفة اليد ستفزاز ضربو فى طلطــّـاش.

المحترف كايدخول ألـّـمتجر، مفركس، مڭرفط، رادّ الشعر كولـــّـو ألــّـور، “كوب دي كابريوو”، نظــارات “رايبان دو لوكس”، اللي ما عجبوش الحال ما إكون غير عنود، حقود، إعيش مع الـدّود، بالنسبة ليه أو لجميع المتكـبــّـرين، كايدوّر عينيه: هاد الخيرات كولــّـها كاتســنـــّـاني، خصّـني غير نعرف نتعامل معاها، كايخمـّـم دابا كيفاش يمكن ليه إحط يـدّيه على شي حاجة بلا ما إشوفو شي حـدّ، أو اللي شافو يقسم معاه، عصابة، فى الحقيقة ما كرهش يتخلــّـص من هاد الطبيعة، ولاكن هاد الشي اللي جاب الله، طرف من مرض بثولوجي، شق من شخصية مهزوزة، هاد العمليات مرتبطة أصلا بالإفراط فى حب الذات اللي كاتدل ّ على أعراض نرجسية مزمنة، على تضخم آنا مرضية، أو كل هاد القوم عندهم قاسم مشترك: عجرفة، إفـراط فى المطالب، أو فى غالب الأحيان جنون العظمة، أو هاد النماذج المشؤومة متوفـرة لا فى الدول العربية لا فى شمال إفريقيا، بحال بن علي التونسي اللي كان مكدّس فى قصرو الملاير ديال السانتيمات من جميع العملات اللي تجيك على بالك.

اللي خفيفة يـدّيه ما كايبغي غير إشير ليك بأنه بالشان أو المرشان، غالب الأحيان هاد الشخص كايكون مغرور، كـولـــّـو عـُـجب، كايتحاسب راسو فوق القانون، هادا ما كايعرف لا حدود، لا كايحتارم مـُـلك الآخرين، بحال هادوا اللي كايـڭـريسيوْا المواطنات، المواطنين، اللي خفيفة يـدّيه معلقة أو يطمع فيها، لأنه كايلقى فيها متعة، رياضتو المفضلة اللي كاتزيد تحل ليه الشهية، أو حتى إيلا هـزّ شي حاجة ماشي ديالو، الضمير الله إجيب، هوما اللي غبيين، ما حصــّـلوهش، طولانطي.

شاف شي صـبـــّاط زوين، عجبو، لبسو أو حـط ّ تقاشرو، صبـّـاطو المعفون على الرف، شحال كايتسـلـــّـى غير كايشوف شي زبون رفـد صباطو أو مشى بيه “ألاكيس”، الخطير فى الأمر هو أن هادوا عندهم صحاب، مـكوّنينن عصابات، فى الدول المتقدمة كولــّـهم كايتهرّبوا من صحاب اليدّين الخفيفة، لأن شعارهم: مع من شفتك، شبــّـهتك، مصير الدول المتخلقة هو هادا: السلب، النهب أو الــڭـريساج بالعلا ّلي، مسكينة الغريبة: خطفوها، طالبين من الشعب يدفع الـفـدية: راتب، معاشات مضخمة، إيلا بغيتي أنـــّـوب عليك، صبر عليــيا شي شوية، مرة، مرة كايـدّيني النعاس فى البرلمان، ماشي ڭـاع ما نجيش بحال شي وحدين اللي جامعين الشكارة ب “البقررة”.

المؤسف هو أنني ما كانشوف حتى شي تحسن، حل، لأن هادوا عندهم مشكل مع الواقع اللي ما كايتقبلوهش، أو اللي خفيفة يـدّيه، أو تحـوكــّـها ليه بالسـّـودانية، إغـطسها فى الغريبة، إغـطسها، ما مشى حتى سرطها بكاغيطها، متلاك النفس ما ساهلش، بالأخص إيلا كانوا الشهوات، ملذات الدنيا أو الآخرة، عاميين البصيرة، جـارّين من تحتو الحصيرة، بالفعل: أصعب معركة هي اللي كاتدور بينك أو بين ذاتك، يعني النقد خــصـّـو إكون نقد ذاتي، مسؤول، صريح، ولاكن كيفاش غادي أتـــّـم هاد العملية فى مجتمع عزيز عليه الكـذوب، البهتان، التبوحيط، كايعبث بالغريبة، لأن الغريبة فى أول الأمر من فلوس ضرائب المغاربة، المغربيات، أمـنييــّـتي الوحيدة اللي عندي: يــتــــّـغـلبوا صحاب خفافين اليد أو الصباع شي نهار على البلية اللي ساكناهم، الشرفاء تحت قبة البرلمان ما معنييش بهاد الهضرة، غير الشلاهبية، الإنتهازيين، “أصحاب الحسنات المقلوبة و السوابق البرلمانية”.

‫تعليقات الزوار

5
  • Observateur
    الثلاثاء 16 أكتوبر 2018 - 11:13

    صاحب المقال، الله يعطي الصحة، هذا دليل أن اللغة المغربية لغة العصر بامتياز، لغة العلم و الاقتصاد و القانون ووو .. لغة الحاضر و المستقبل .. لغة مفهومة عند الجميع .. بها نمشيو بعيد في شتى المجالات .. في نضري المتواضع، يجب ترسيمها و جعلها لغة التعليم .. و بعد ذلك أهلا و سهلا بجميع لغات العالم

  • متتبع
    الثلاثاء 16 أكتوبر 2018 - 11:49

    أولوية الأولويات هو جعل من اللغة المغربية التي يفهمها و يتحدث بها جميع المغاربة لغة التدريس في المدرسة المغربية .. مغربة التعليم واجب ديني، وطني و إنساني .. لكن أكثرهم لا يعلمون .. هذا التوجه سيخدم البلاد و العباد حاضرا و مستقبلا في شتى المجالات.

  • فِكرا
    الأربعاء 17 أكتوبر 2018 - 18:09

    الاستاد ديالنا الكريم
    عندي واحد لملاحضة الى سمحتي مدام كنكتبو بالدارجة كنقترح عليك نكتبو بالدارجة كيف كنهضرو بها باش تكون قرايتها وكتبنها ساهلة على كلشي ، فمثلا ملّي كنهضرو بالدارجة ماكنطقوش ب "ذ" كنطقوه "د" وماكنطقوش "ظ" كنطقوه "ض" ومكنطقوش "ث" كنطقوه "ت' امكنديروش الفرق بين "س" و"ص"
    وإلّا غادي نعقدو كتابة الدارجة وتولي ليها نفس الصعوبة بحال العربية
    فالنجليزية اللغة "وان" في العالم بالاقتصاد طبعا ولكن كتميز بانها لغة ساهلة في التعلم وسرها هو انها تكتب بحال الهضرة بها .باش كيهضرو باش كيكتبو

  • فخور بمغربيتي
    الخميس 18 أكتوبر 2018 - 06:33

    شحال ممتع تكتب و تقرا كيفما كتكلم و بتقافتك و بتقافة جدودك، اشحال زوين منين كتقرا كلمات قصيدة زجلية مغربية ديال الملحون أو الأندلسي أو الغرناطي أو قصائد العيطة اللي كتحكي على جدودك المغاربة و كيفاش عاناو و الهمة ديالهوم و كيفاش حاربو لحتلال و هاد الشي اللي المفروض يتقرا لولاد المغاربة ماشي قصائد الشرق اللي مكتعبرش على روح المغربي الغربي مثل "مكر مفر مقبل مدبر…" أو " ولقد شربت من المدامة بعدما ….". كمغاربة عندنا رصيد تقافي كبير بزاف خاص نهتمو بيه و نحافضو عليه من الضياع و نميوه.
    و كيفما قال الأخ رقم 3 – فكرا:
    من الأفضل نبقاو نكتبو لغتنا المغربية كيفما كنطقوها فحال النگليزية، حنا المغاربة معندناش فلغتنا "ث" ولا "ظ" ولا "ذ" اللي في العربية.
    صباحكم مبروك طاقم هسبريس و كل القراء.

  • رشا
    الخميس 18 أكتوبر 2018 - 14:17

    على حساب هاد المفال الله يرحمك ويجدد عليك الرحمات ا االادب العربي

صوت وصورة
سكان مدينة مراكش بدون ماء
الثلاثاء 19 مارس 2024 - 01:05 3

سكان مدينة مراكش بدون ماء

صوت وصورة
خارجون عن القانون | عواقب عقوق الوالدين
الإثنين 18 مارس 2024 - 23:30

خارجون عن القانون | عواقب عقوق الوالدين

صوت وصورة
كاريزما | حمزة الفيلالي
الإثنين 18 مارس 2024 - 22:30 1

كاريزما | حمزة الفيلالي

صوت وصورة
خيوط البالون | المقلب الأخير لري تشيكوني
الإثنين 18 مارس 2024 - 22:00

خيوط البالون | المقلب الأخير لري تشيكوني

صوت وصورة
رمضانهم | أجواء رمضان في روسيا
الإثنين 18 مارس 2024 - 21:30

رمضانهم | أجواء رمضان في روسيا

صوت وصورة
ابراهيم دياز يصل إلى المغرب
الإثنين 18 مارس 2024 - 18:09 17

ابراهيم دياز يصل إلى المغرب