انتظارات في حي البركة

باش يكونوا المنازل و الطرقان مزيانين بحال في اوروبا، علاش المغاربة كيصنعوا الطراكسات و البلدوزيرات و الجرافات و الدكاكات و الرافعات و الكميوات و التراكتورات و الماكينات ديال الكياس و الاسمنت و الزفت و علاش المغاربة كيصنعوا البلاستيك او البشكليتة؟ و باش نسربيوا في البناء و الطرقان، علاش العطاشة و الخدامة ديال البناء قراوا الماط و الفيزيك و الشيمي و الهندسة و الجيولوجية و عندهوم تكوين مزيان في استعمال الآلات؟ و راه المهندسين و المعماريين و المسؤولين ماشي غير كيغشوا، و لكن مكيعرفوش كيفاش وخا عندهوم حسن النية و وخا عندهوم الفلوس، ماكافيينش!
هادوك لي كيستوردوا السيارات،خاص كل واحد يستورد معاه كيلومتر ديال الطريق مزفتة و ميترو ديال القنطرة و ميترو ديال الانفاق و 10 علامات السير و الدولة تستورد العمارات من اليابان… ماشي الف مغربي خدام 6 ايام في الاسبوع على مدار السنة باش ينتج كمية من ماطيشة او الليمون لي يالله كنستوردو بها سيارة خفيفة او 10 ديال التليفونات صنعهم اوروبي او صيني واحد في ظرف يوم عمل!

راه الهاتف الذي بين ايديكم، راه فيه الهندسة و المعمار، داخله بحال شي هندسة او معمار ديال شي مدينة في اليابان. و نفس الشيء بالنسبة للسيارة، بل هندستهما متطورة احسن بكثير و بما ان المغاربة يستوردون الهاتف و السيارة يجب كذلك استيراد العمارات و المنازل و القناطر و الانفاق من جابون او الشينوا او مريكان! باش المغاربة يرتاحوا كيستهلكوا و يريحوا بين القهاوي و المساجد و المنازل و الاسواق او مخبيين في السيارات كيجولو و كيتسناوا حتى يموتوا!
العمارات العربية المتحدة لي عندها الفلوس، مطورة كتستورد الماتريال و الآلات بالعمال ديالها و كتبني العمارات في بلادها و المغاربة لي لاباس عليهوم مطورين اكثر من الاماراتيين، كيديوا الفلوس للخارج و كيشريوا العمارات تماك حيث جميع المرافق و الطرقان موجودين و بلا ميتسناوش و يتبرزطوا مع كثرة الخدمة و الصداع ديال الخدامة و ترونسبور ديال الماترييل، بحال لي كيديرو البرلمانيين و الوزراء لي كيشريوا الشقق عند الخدامة ديالهوم لي بناوهوم في بارس و اسبانيا و فلوريدا!